پی ٹی آئی کا سیالکوٹ میں جلسہ، عمران خان پر انڈوں اور ٹماٹروں کے حملہ کا منصوبہ

سیالکوٹ(ویب ڈیسک)پی ٹی آئی کے سربراہ عمران خان پر جلسے کے دوران انڈوں اور ٹماٹروں سے حملے کا منصوبہ بنالیا گیا اور نشانہ لگانے والے کیلئے 2 لاکھ روپے انعام کا اعلان کردیا گیا ہے۔نجی ٹی وی کے مطابق وفاقی وزیردفاع خواجہ آصف کے گڑھ سیالکوٹ میں آج پاکستان تحریک انصاف کے ہونیوالے جلسے میں چیئرمین عمران خان پر انڈوں اور ٹماٹروں سے حملہ کرنے کی منصوبہ بندی کرلی گئی ہے اور یہ منصوبہ بندی حمزہ یوتھ ونگ کے رہنما ولید آصف بٹ کی جانب سے تیار کی گئی ہے۔اس مقصد کو پورا کرنے کے لئے لیگی کارکن انڈوں اور ٹماٹروں کے ساتھ گوجرانوالہ سے سیالکوٹ پہنچ گئے ہیں اور انڈوں اور ٹماٹروں پر ”رو عمران رو“ کے نعرے درج کئے گئے ہیں۔یوتھ ونگ رہنما ہمایوں چودھری کی جانب سے اعلان کیا گیا ہے کہ نشانہ لگانیوالے کو 2 لاکھ روپے انعام دیں گے جبکہ ولید آصف بٹ کا کہنا تھا کہ نواز شریف سے متعلق بد زبانی پر عمران خان کو انڈے ماریں گے۔یاد رہے کہ ولید بٹ نے اسلام آباد لاک ڈاؤن کے دوران پی ٹی آئی کے پیدل مارچ پر بھی انڈے برسائے تھے۔واضح رہے کہ پی ٹی آئی آ ج سیالکوٹ میں عوامی طاقت کا مظاہرہ کرے گی جس کے لئے تیاریاں زورشورسے جاری ہیں۔

اپنا تبصرہ بھیجیں