شرجیل میمن کی وزیراعظم نواز شریف اوربھارت صنعت کارسجن جندال کی ملاقات پر شدید تنقید

کراچی(مانیٹرنگ ڈیسک) پاکستان پیپلزپارٹی کے رکن سندھ اسمبلی شرجیل میمن نے وزیراعظم اور بھارتی صنعتکار سجن جندال کی ملاقات پر تنقید کرتے ہوئے انکشاف کیا کہ پاکستان اسٹیل مل جندال کو فروخت کرنے کی منصوبہ بندی کی جارہی ہے۔تفصیلات کے مطابق سندھ اسمبلی کے ہنگامہ خیز اجلاس میں پی پی رہنما شرجیل میمن نے وزیراعظم کو شدید تنقید کا نشانہ بناتے ہوئے کہا کہ وزیراعظم کی اجازت سے بھارتی صنعتکار سجن جندال کو اسلام آباد اور لاہور کا ویزا جاری کیا گیا اور انہی کی اجازت سے جندال کو مری کا بھی ویزہ دیا گیا۔انہوں نے انکشاف کرتے ہوئے کہا کہ پاکستان اسٹیل مل جندال کو فروخت کرنے کی منصوبہ بندی کی جارہی ہے اور اس مقصد کیلئے جندال کا فرنٹ مین کوئی اور آدمی ہوگا۔شرجیل میمن نے مزید کہا کہ نواز شریف جب بھی پریشانی میں ہوتے ہیں تو بارڈر پر کشیدگی بڑھ جاتی ہے اور وزیراعظم کی جندال سے ملاقات کا مقصد بتایا جائے۔سندھ اسمبلی میں خطاب کرتے ہوئے شرجیل میمن نے کہا کہ اسٹیل مل کی فروخت کی سازش کو کسی بھی صورت کامیاب نہیں ہونے دیں گے ،اسٹیل مل ذوالفقار بھٹو نے بنائی تھی اور ہم نواز شریف کا یہ خواب کسی بھی صورت پورا نہیں ہونے دیں گے۔

اپنا تبصرہ بھیجیں