لائن آف کنٹرول کے دونوں جانب اور دنیا بھر میں مقیم کشمیری پیر (آج) یوم شہدائے جموں منائیں گے تاکہ شہدا کے ناقابل تنسیخ حق خودارادیت کے حصول تک شہدا کے مشن کو جاری رکھنے کے عزم کا اعادہ کیا جاسکے۔
مہاراجہ ہری سنگھ کی افواج، بھارتی فوج اور ہندوتوا فورسز نے 1947 میں نومبر کے پہلے ہفتے میں جموں خطے کے مختلف حصوں میں لاکھوں کشمیریوں کا قتل عام کیا تھا جب وہ پاکستان ہجرت کر رہے تھے۔
اے پی ایچ سی رہنماؤں اور تنظیموں نے سرینگر میں اپنے بیانات میں جموں کے شہدا کو خراج عقیدت پیش کرتے ہوئے کہا کہ ان کا خون رائیگاں نہیں جائے گا۔ انہوں نے کہا کہ شہدائے جموں نے ایک مقدس مقصد کے لئے اپنی جانوں کا نذرانہ پیش کیا ہے اور ان کی بے مثال قربانیوں کو کبھی فراموش نہیں کیا جائے گا۔
رہنماؤں اور تنظیموں نے کہا کہ 1947 میں جموں کے مسلمانوں کی دل دہلا دینے والی نسل کشی دنیا کے سب سے بڑے سانحات میں سے ایک تھی جس میں لاکھوں مسلمان مارے گئے تھے۔
انہوں نے کہا کہ شہداء کو خراج عقیدت پیش کرنے کا بہترین طریقہ یہ ہے کہ ان کے مشن کو منطقی انجام تک پہنچنے تک جاری رکھا جائے۔
دریں اثنا آزادی پسند تنظیموں نے سرینگر اور علاقے کے دیگر حصوں میں پوسٹر آویزاں کیے جن میں جموں قتل عام کے متاثرین کو خراج عقیدت پیش کیا گیا۔ لوگوں سے کہا گیا ہے کہ وہ یوم شہدا پوری عقیدت کے ساتھ منائیں۔
