کراچی: اقوام متحدہ کے صنعتی ترقی کے ادارے یونیدو اور سندھ انٹرپرائز ڈیولپمنٹ فنڈ (سیڈف) نے یورپی یونین کے تعاون سے دیہی سندھ کے منتخب اضلاع میں چھوٹے اور درمیانے درجے کے کاروباروں کے لیے مشترکہ گرانٹ اسکیم متعارف کرادی ہے۔ اس اسکیم کے تحت اہل منصوبوں کو زیادہ سے زیادہ 3.5 کروڑ روپے تک مالی معاونت فراہم کی جائے گی۔
سیڈف کے آن لائن گرانٹ پورٹل کے مطابق یہ پروگرام یونیدو کے پاڈار منصوبے کے تحت جاری کیا گیا ہے، جس کا مقصد دیہی سندھ میں غربت میں کمی، کاروباری سرگرمیوں کے فروغ اور پسماندہ آبادیوں کے لیے پائیدار آمدنی کے مواقع پیدا کرنا ہے۔ اہل کاروباری ادارے اپنے کاروبار کو وسعت دینے، پیداواری صلاحیت بہتر بنانے اور روزگار پیدا کرنے کے لیے گرانٹ حاصل کرسکتے ہیں۔
درخواست جمع کرانے کی آخری تاریخ
سرکاری پورٹل پر دی گئی معلومات کے مطابق گرانٹ کے لیے درخواستیں 15 ستمبر 2026 تک جمع کرائی جاسکتی ہیں۔ اسکیم میں جدت پر مبنی اور ترقی کی صلاحیت رکھنے والے چھوٹے و درمیانے کاروباروں سے قابلِ عمل کاروباری تجاویز طلب کی گئی ہیں۔
سیڈف کی ویب سائٹ پر جاری اعلان کے مطابق اسکیم کا ہدف ایسے کاروبار ہیں جو مقامی معیشت کو مضبوط بنانے، روزگار کے مواقع پیدا کرنے اور کم آمدنی والے طبقات کے لیے پائیدار معاشی سرگرمیاں پیدا کرنے میں کردار ادا کرسکیں۔ ادارے نے ممکنہ درخواست گزاروں کو کاروباری خیال اور قابلِ عمل منصوبہ پیش کرنے کی ہدایت کی ہے۔
کن شعبوں کو ترجیح حاصل ہوگی؟
سیڈف کی ترجیحی شعبوں کی فہرست میں زرعی مصنوعات کی پروسیسنگ، باغبانی، ڈیری و لائیو اسٹاک، پولٹری، ماہی گیری، ذخیرہ گاہیں اور کولڈ چین، متبادل توانائی، خواتین کی کاروباری سرگرمیاں، معدنیات کی پروسیسنگ اور ٹیکنالوجی و جدت شامل ہیں۔
یونیدو کے مطابق پاڈار منصوبہ دیہی سندھ کے کاروباری اداروں کو مالی معاونت کے ساتھ کاروباری منصوبہ بندی، فزیبلٹی تجاویز، تکنیکی رہنمائی، مارکیٹ روابط اور برآمدی تیاری میں بھی مدد فراہم کررہا ہے۔ ادارے کے مطابق اب تک اس پروگرام کے ذریعے دیہی سندھ کے 308 چھوٹے، درمیانے اور انتہائی چھوٹے کاروباروں کو مجموعی طور پر 30 کروڑ روپے کی گرانٹس دی جاچکی ہیں۔
پاڈار پروگرام کا ہدف منصوبے کی تکمیل تک 1,800 کاروباری اداروں کی معاونت اور 6,000 سے زیادہ روزگار کے مواقع پیدا کرنا ہے۔ پروگرام کے مرکزی اضلاع میں ٹھٹھہ، بدین، سجاول، تھرپارکر اور لاڑکانہ شامل ہیں، جہاں دیہی کاروبار، خواتین اور نوجوانوں کے لیے معاشی مواقع بڑھانے پر توجہ دی جارہی ہے۔