امریکی صدر ڈونلڈ ٹرمپ کی جانب سے واشنگٹن ڈی سی میں نیشنل گارڈ کے ہزاروں اہلکار تعینات کرنے کی مہم پر نئی تحقیق نے سوالات اٹھا دیے ہیں۔ رائٹرز کے مطابق دارالحکومت میں موجود تقریباً 4,500 فوجی اہلکار شہر کے 3,200 پولیس افسران سے بھی زیادہ ہیں، لیکن فوجداری مقدمات میں ان کا عملی کردار محدود دکھائی دیتا ہے۔
رائٹرز نے ڈسٹرکٹ آف کولمبیا کی سپیریئر کورٹ میں دائر کیے گئے تمام دستیاب چارجنگ دستاویزات کا جائزہ لیا۔ تحقیق میں ایسے 217 مقدمات ملے جن میں نیشنل گارڈ کی موجودگی یا مداخلت کا ذکر تھا، جو عدالت میں درج ہونے والے مجموعی جرائم کا تقریباً 1.3 فیصد بنتے ہیں۔ ان میں 62 معاملات میں اہلکاروں نے پولیس کی مدد کے بغیر مشتبہ افراد کو روکا، جبکہ 43 کیسز میں پولیس کے ساتھ مل کر گرفتاری میں معاونت کی۔
رپورٹ کے مطابق فوجیوں کی زیادہ تر کارروائیاں معمولی نوعیت کے واقعات سے متعلق تھیں، جن میں دکان سے چھوٹی اشیا چوری کرنا، میٹرو کا کرایہ ادا کیے بغیر گزرنا، بس پر پتھر پھینکنا یا بغیر ادائیگی کے مشروب پینا شامل ہے۔ ایک واقعے میں پولیس نے ایک شخص کو گرفتار کیا جو ایک خاتون پر حملہ کر رہا تھا، حالانکہ پولیس رپورٹ کے مطابق قریب موجود تقریباً 15 نیشنل گارڈ اہلکاروں نے کارروائی نہیں کی۔
زیادہ محفوظ علاقوں میں گشت
رائٹرز کی جانب سے عدالتی ریکارڈ، شہری آبادی کے اعدادوشمار اور جرائم کے نقشوں کا تقابل کرنے پر معلوم ہوا کہ فوجی اہلکار زیادہ تر شہر کے مرکزی، خوشحال، سفید فام آبادی والے اور نسبتاً محفوظ علاقوں میں نظر آئے۔ ان میں قومی یادگاریں، میٹرو اسٹیشن، نیشنل مال اور بیس بال اسٹیڈیم کے اطراف شامل ہیں۔
رپورٹ میں کہا گیا ہے کہ گزشتہ پانچ برسوں میں واشنگٹن کے 859 قتلوں میں سے تقریباً 82 فیصد جن علاقوں میں ہوئے، وہاں نیشنل گارڈ اہلکاروں کی جانب سے قانون نافذ کرنے کی کوئی واضح مثال عدالتی ریکارڈ میں نہیں مل سکی۔ جنوب مشرقی واشنگٹن کے زیادہ جرائم والے وارڈ 8 کے بعض رہائشیوں نے کہا کہ انہوں نے پورے سال کسی گارڈ اہلکار کو وہاں نہیں دیکھا۔
اربوں ڈالر کی ممکنہ لاگت
ایسوسی ایٹڈ پریس کے مطابق محکمہ دفاع کے تخمینے میں جنوری 2029 تک تعیناتی جاری رکھنے کی لاگت تقریباً 1.4 ارب ڈالر بتائی گئی ہے۔ جولائی کے اواخر میں واشنگٹن میں 23 ریاستوں اور علاقوں سے تعلق رکھنے والے تقریباً 4,600 فوجی اہلکار موجود تھے، اگرچہ ان میں سے کچھ کو قومی تقریبات اور دیگر حفاظتی کاموں کے لیے بھی بلایا گیا تھا۔
ٹرمپ انتظامیہ کا کہنا ہے کہ تعیناتی کا مقصد جرائم پر قابو پانا، قانون نافذ کرنے والے اداروں کی مدد اور شہر کی صورت حال بہتر بنانا ہے۔ تاہم مقامی حکام اور ناقدین کے مطابق فوجی موجودگی نے دارالحکومت کو غیرضروری طور پر عسکری رنگ دے دیا ہے۔ رائٹرز کی تحقیق نے یہ بھی واضح کیا کہ نیشنل گارڈ اہلکاروں کے اختیارات محدود ہیں؛ وہ مشتبہ افراد کو عارضی طور پر روک سکتے ہیں، مگر باضابطہ گرفتاری کے لیے پولیس کو بلانا ضروری ہوتا ہے۔