جوہر بھرو: پاکستان کی جونیئر ہاکی ٹیم نے سلطان جوہر کپ میں اپنی شاندار کارکردگی کا سلسلہ جاری رکھتے ہوئے کینیڈا کو 6-2 سے شکست دے دی ہے۔ اتوار کو جوہر بھرو کے تمن دایا ہاکی اسٹیڈیم میں کھیلے گئے میچ میں گرین شرٹس نے ابتدا سے ہی کھیل پر گرفت مضبوط کر لی اور ایونٹ میں مسلسل دوسری فتح حاصل کی۔
پاکستان نے نویں منٹ میں حمزہ فیاض کے گول سے برتری حاصل کی، جبکہ پانچ منٹ بعد حمزہ علی نے دوسرا گول کر کے برتری دوگنی کر دی۔ رانا عبداللہ سمی نے 25ویں منٹ میں تیسرا گول داغ کر پاکستان کو مضبوط پوزیشن میں پہنچا دیا۔
کینیڈا نے 30ویں منٹ میں بھلر گرنور کے گول سے ایک گول واپس کیا، لیکن پاکستان نے 38ویں منٹ میں رانا ولید کے گول سے تین گول کی برتری بحال کر لی۔ 45ویں منٹ میں کینیڈا کے ابھیرام یوگیشورن نے دوسرا گول کر کے اسکور 4-2 کیا، تاہم آخری کوارٹر میں پاکستان نے اپنا جارحانہ کھیل جاری رکھا۔ آصف حیدر نے 51ویں منٹ میں پانچواں گول کیا اور عدیل نے 54ویں منٹ میں چھٹا اور آخری گول کر کے پاکستان کی 6-2 سے جیت پر مہر ثبت کی۔
اس سے قبل پاکستان نے ہفتے کو ایونٹ کے اپنے پہلے میچ میں چین کو 8-3 سے شکست دی تھی۔ یہ انڈر 21 ایونٹ ہے جس میں پاکستان، کینیڈا، چین، ملائیشیا اور جاپان کی ٹیمیں حصہ لے رہی ہیں، جبکہ دفاعی چیمپئن آسٹریلیا اس بار شریک نہیں ہے۔
پاکستان ہاکی فیڈریشن کے صدر محی الدین احمد وانی نے جونیئر ٹیم اور کھلاڑیوں کی شاندار کارکردگی پر مبارکباد دی اور آنے والے میچوں کے لیے نیک تمناؤں کا اظہار کیا۔
ایونٹ کی دو بہترین ٹیمیں 24 اکتوبر کو ہونے والے فائنل میں جگہ بنائیں گی، جبکہ تیسری اور چوتھی ٹیمیں تیسرے نمبر کے لیے کھیلیں گی۔ پاکستان اپنا اگلا میچ 21 اکتوبر کو میزبان ملائیشیا کے خلاف کھیلے گی۔
ذرائع: ڈان نیوز، ایکسپریس ٹریبیون